✅ Шүүхийн шийдвэр гүйцэтгэх ерөнхий газрын харьяа 407 дугаар нээлттэй, хаалттай хорих ангийн түүхт 50 жилийн ой 2024 онд тохиож байгаатай холбогдуулан “ГУРВАН ҮЕИЙН УУЛЗАЛТ-НОМЫН НЭЭЛТ”-ийн арга хэмжээг зохион байгуулж ахмад ажилтнуудаа 2024 оны 06 дугаар сарын 06-ны өдөр Улаанбаатар зочид буудлын ёслолын танхимд хүлээн авч, хүндэтгэл үзүүллээ.
✅ Энэхүү арга хэмжээний зорилго нь түүхийн бүхий л цаг хугацаанд хорих байгууллагын, тэр дундаа эмэгтэйчүүдийн хорих ангийн үйл ажиллагааг бэхжүүлэх, хуулиар хүлээсэн чиг үүргээ амжилттай хэрэгжүүлэхэд өөрийн мэдлэг ур чадвар, залуу насаа зориулсан ахмад ажилтнуудад хүндэтгэл үзүүлэхийн зэрэгцээ дунд, залуу үеийн алба хаагчдад сургамж, зөвлөгөө өгөх, гурван үеийн хэлхээс, залгамж чанарыг бэхжүүлэхэд чиглэсэн юм.
✅ Тус арга хэмжээний нээлтийн үеэр ШШГЕГ-ын даргын зөвлөлийн гишүүн, Ахмадын хорооны дарга, ангийн дарга, бусад анги байгууллагын ахмадын зөвлөлийн төлөөлөл, хүндэт зочид 407 дугаар ангийн ахмад ажилтнуудад 50 жилийн ойн баярын мэнд дэвшүүлж, зарим ахмад ажилтныг шагнаж урамшууллаа.
✅ Уулзалт, арга хэмжээний нэг онцлог нь төрөлх анги, байгууллагынхаа түүхийг номын хуудаснаа мөнхлөх, ахмад үеийнхээ алдар гавьяаг түүх болгон үлдээсэн “ГЭРЭЛТ ИРЭЭДҮЙД ХӨТӨЛСӨН ХАГАС ЗУУН ЖИЛ” ойн ном болон хүмүүжигчдийн туурвисан шүлэг, өгүүллэг, уран зургыг эмхэтгэсэн “СЭТГЭЛ ХӨГЛӨСӨН УЧИГ” бүтээлийн нээлтийг зохион байгуулсан явдал байлаа.
✅ Номын нээлтийн үеэр 407 дугаар нээлттэй, хаалттай хорих ангийн ном бүтээх ажлын хэсгийн гишүүд номын танилцуулга хийж, ахмад ажилтны төлөөлөл болон “Болор цом”-ын эзэн, яруу найрагч, зохиолч, Богд хааны музейн захирал Ц.Эрдэнэбаатар номын мялаалга үг хэлсэн бөгөөд номын дээжээс хүндэт зочдод гардууллаа.
✅ Уулзалт, арга хэмжээнд Монгол Улсын ардын жүжигчин Ч.Чимэдцэеэ, ШШГЕГ-ын Соёмбо чуулга, Хилийн цэргийн дуу бүжгийн чуулга, Цэргийн дуу бүжгийн чуулга, Баянзүрх дүүргийн соёлын ордоны уран бүтээлчид оролцож, дуу хуурын дээжээс өргөн барисаны хажуугаар ахмад, залуу, дунд үеийн төлөөлөл үг хэлж, авьяасаа үзүүлэх, азын сугалаа сугалах зэрэг арга хэмжээг зохион байгууллаа.
✅ Ийнхүү Улаанбаатар зочид буудлын хүндэтгэлийн танхимд эхэлсэн уулзалт, арга хэмжээ халуун дулаан, элэгсэг уур амьсгал дунд болж, уулзаагүй удсан ахмадууд сэтгэлийнхээ хөөр баярыг хуваалцав.
